རྐང་གླིང་གི་འགྱུར་ཁུགས།

བསླུ་བྲིད་ཡིབ་འདྲའི་འཛུམ་ཞལ་དག།

ས་རྡུལ་འཚུབ་པའི་གྲོང་ན་ལྷགས།

རིང་ནས་གྱེས་པའི་གྲོགས་པོ་དེ།།

རེ་སྒུག་ས་ཚུགས་དང་པོ་ན།།

འགྱིག་གི་ངོ་གདོང་ཚེར་མས་རྒས།།

སྐྲ་དང་ཁ་སྤུས་སྐྱོ་སྣང་འཁུར།།

འདི་ལྟར་གསོན་པའི་རྐང་གླིང་བུ།།

ཚེ་རབས་གཅིག་གི་མྱ་ངན་ཡིན།།

ཡང་མོའི་གཤིས་ཀ་རླུང་གིས་བསྐྱོད།།

ལྕི་མོའི་གོམ་ཁ་རྡོ་ལ་ཐོགས།།

སེམས་ཤུགས་རལ་བའི་ས་སྲོད་དེ།།

ང་ལ་ཐོབ་པའི་གདམས་པ་ཡིན།།

ཐོབ་འོས་ཁ་པར་བུ་མོ་དེ།།

ཁ་སང་བར་ཐག་རྒྱང་དུ་ཕྱིན།།

ལོ་གསུམ་བྲིས་པའི་དྲན་ཐོ་དེ།།

སྤྱིལ་ཆུང་ཞིག་གི་ཟུར་ནས་རྒས།།

ཁོ་མོས་སྐྲ་ཚོགས་རླུང་ལ་བསྐུར།།

བརྩེ་སེམས་དག་ནི་ཆུ་ལ་གཡུག།

སྐྱོ་བས་འཇུམས་པའི་མིག་ཆུ་ཡིས།།

ས་ལ་གདུང་བའི་འཇའ་ཚོན་འཐག།

བརྩེ་བའི་ཟླ་བ་སྨག་གིས་ཟས།།

འབའ་རྡེའུ་དེ་ནི་གཞན་གྱིས་འཐུས།།

ཀྱེ་ཧུད་སྤུན་གསུམ་ཆང་ཁང་འདི།།

རྐང་གི་གླིང་བུ་ཁོ་ནས་གཉེན།།

ཆར་རླུང་འཚུབ་པའི་མཚན་ལྗོངས་དེར།།

བྱང་གི་སྐར་མ་སྨེ་བདུན་ཞེས།།

འོད་ཁྱིམ་ནང་གི་ཕྲུག་གུ་དག།

དེ་རིང་བདག་གིས་དྲན་ན་འོས།།

རྨི་ལམ་གྲོང་གི་མེ་ཏོག་འཚོ།།

འབྲོང་ཆུའི་འགྲམ་ན་ལང་ཚོས་ཕྱུག།

ཕྱིར་དྲན་དང་ནི་ན་ཟུག་དག།

བརྙན་འཕྲིན་ནང་གི་ཟློས་གར་འདྲ།།

ཉི་མ་ནུབ་པའི་ས་སྲོད་དེར།།

བརྩེ་བའི་ངོ་གདོང་ཆུ་ཡིས་བསྣེམ།།

ལུག་ཆུང་འཚོ་བའི་ཁོ་མོ་ཡིས།།

ང་ལ་སྙན་ངག་རྐང་གཅིག་གནང་།།

གྱེས་བྲལ་རླུང་བུ་ལྡང་བའི་ཉིན།།

མཆི་མའི་ཨ་རག་སྙིང་ལ་འཐུང་།།

གནས་ལ་འགྲོ་བའི་ཨ་ཅེ་དག།

ཁོ་བོ་དང་ནི་ན་ཟུག་གཅིག།

ཁ་བ་བུ་ཡུག་ག་ལེར་འཚུབ།།

མུན་པའི་མགྲོན་པོ་ཁད་ཀྱིས་སླེབས།།

རྩམ་དྲི་ཡལ་བའི་གནས་ཚང་དུ།།

སྡུག་གཏམ་ཁ་ཤས་གྲོགས་པོར་བཤད།།

ལྡུམ་ར་སྐྱ་བོའི་གྲུ་ཟུར་ནས།།

དྲན་གདུང་ལོ་མ་རླུང་ལ་བསྐྱོན།།

ཕྱིར་མིག་མེད་པའི་མི་དེ་ཡི།།

དྲ་ཚིགས་ནང་གི་སྐད་ཆར་སྒུག།

ལྕགས་སྨྱུག་ཕྲ་མོའི་འགུལ་སྟངས་དེས།།

རུས་རྐང་ཞིག་གི་བླ་སྲོག་གཉོར།།

ཤི་ན་དུར་ཁྲོད་འདི་ཡིན་པས།།

ང་ལ་མཆི་མ་གཏོང་མཁན་སུ།།

ནུབ་མཐའི་ཉི་འོད་འཇམ་པོ་དང་།།

ལྷིང་ཞིང་འཇགས་པའི་མཚོ་འགྲམ་དུ།།

ཁྱོད་ཀྱིས་ལྟོས་དང་ཁོ་བོ་ནི།།

ད་དུང་འགྲོ་སྟངས་གཅིག་གིས་བགྲོད།།

རེ་སྒུག་ས་ཚུགས་གཉིས་པ་ན།།

ང་དང་གྲོགས་པོའི་སྙན་ངག་ཡོད།།

ལོ་ཟླའི་ལྟེབས་དང་མཚོ་འགྲམ་དུ།།

གཏམ་རྒྱུད་ཆུ་མིག་རེ་རེ་འཁྱིལ།།

好作文



介绍一下我的母校```````和平智慧学院





ཁ་བ་ཅན་གྱི ༢ ༠ ༠ ༨

མེས་པོ་དག་གིས
བསང་ཞིག་ཕུལ་ནས་དུང་ཞིག་བུས་ཏེ
ཁྱོད་རང་བུ་ཕོ་ཞིག་ཏུ་བོས་མྱོང་ནའང
ཁྱོད་ཀྱིས
དཀར་ཡོལ་བཟེད་བཞིན་བྲག་སྲིབ་ནས་འཛར་བའི་ཁྲག་ཁུ་འཐུང་བ་དེར
རྗེས་རབས་པ་སུ་ཞིག་གིས བཟོད་སྒོམ་བྱ་ནུས
-----ཚོར་བ་ཐོག་མ།
༢༠༠༨ རེ་བ་དང་སྟོབས་ཤུགས་ཀྱིས་སྦར་བའི་མེ་ལྕེ་ཞིག་ཡིན་ན
ངའི་འཐབ་འཛིང་གི་དུང་སྒྲར་རྣ་བ་གླེག་པའི་སེམས་པ་དེ་བུད་ཤིང་ཞིག་དང་མཚུངས
སྒུག་ཚུལ་དེས
བདག་གི་དོན་ལྔ་སྣོད་དྲུག་མཐའ་དག་མཚོན་ཆའི་མཛོད་ཁང་ཞིག་ཏུ་བསྒྱུར་བཞིན
ཕྱིར་དབྱུང་བའི་དབུགས་ཀྱི་ཁ་རླངས་ལའང་མེ་རྫས་ཀྱི་དྲི་མ་སྟུག་པོ་ཞིག་འཐིབ་ནས་ཡོད
མགྱོགས་བགྲོད་མེ་འཁོར་ཞིག་གི་སྟེང་ནས
༢༠༠༨ཀྱི་བཞིན་རས་ལ་ཕྱིར་བལྟ་ཞིག་བྱས་ན
གས་ཟིན་པའི་ལྕགས་མཁར་གྱི་གྱང་སྲིབ་ནས
ཡལ་ཟིན་པའི་རྣམ་ཤེས་དག་གི་ལག་པ་ཕྱིར་བསྲིང་འོང་སྟེ
“རང་དབང རང་དབང ”ཟེར་དུས
ང་ཚོས་ཀྱང་འབར་ལ་ཁད་ཀྱི་སྙིང་གསོན་པོ་དེ
ཕྱིར་ཕྱུང་ནས
འཇིག་རྟེན་གྱི་སྨག་རུམ་མཐའ་དག་གསལ་བའི་ངར་སྐད་ཅིག་བསྒྲགས་དང་ཅི་ལ་མི་ཆོག
རྟ་རྒྱབ་ཏུ་རྨས་པའི་ལོ་རྒྱུས་ཀྱི་དཔའ་བོ་རེ་རེ
ཤོག་ཧྲིལ་འགའ་དང་ལྷན་ཏུ་མེ་ལ་འཚིག་གིན་པའི་དེ་རིང
ང་ཚོས་ཀྱང
རང་རང་གི་རུས་རྐང་ལས་བཙུར་བའི་ཤ་ཁྲག་གི་བཙན་རྫོང་ཁོ་ནས
དབྱངས་གསལ་གྱི་སྲོག་རྩ་འབྲེགས་པའི་ཇག་པ་དེའི་ཧམ་སེམས་འགོག་དགོས
ཡང་ན མ་འོངས་པའི་དུས་ཤིག་ལ
སྐྱེས་རྒྱུད་ཀྱི་རྩ་བ་སྐམ་ནས་མེས་པོའི་བླ་མཁར་བརྗེད་སྲིད་པའི་དུས་ཤིག་དང
ལོ་རྒྱུས་ཀྱི་རྫ་བུམ་གས་ནས་མི་རིགས་ཀྱི་བླ་སྲོག་འཐོར་སྲིད་པའི་དུས་སྐབས་ཤིག་ཀྱང་ཡོད་སྲིད་སྲིད་མོད
འོན་ཀྱང་དུས་སྐབས་དེ་ནི དེ་རིང་མིན་པ་ང་ཚོ་ལ་ཡིད་ཆེས་བརྟན་དགོས
དེ་ལྟ་མིན་ན
ཡང་སྙིང་ང་ཚོས་ལོ་ཏོག་རེ་བཏབ་ནས་སྟོན་ཁ་ཞིག་ལ་རེ་སྒུག་བྱེད་པའི་དགོས་པ་ཅི་ཞིག
ཁྱིམ་གཞིས་སྔར་བཞིན་བཙུགས་དང་ཆོག་ལ
བརྩེ་བ་སྔར་བཞིན་བཙལ་དང་ཆོག་ན
ཁྱོད་ཀྱིས་སེམས་ཁུར་གྱི་གད་སྙིགས་སྒྲོམ་བུ་གང་སེམས་ལ་ཉར་བཞིན
ས་རྡུལ་གྱིས་ཟས་ཚར་བའི་རྨི་ལམ་ཞིག་ལ་སྐྱབས་རེ་དོན་ཅི་ཡིན
ལྷ་སྐུའི་གཟུང་བཞུགས་ལ་འཕྲུལ་འཁོར་གྱི་ལྷུ་ལག་སྤྲད་ནས
ཁ་བ་ཅན་གྱི་སེམས་ཁ་གདོན་གྱིས་བརླམས་པའི་དེ་རིང
ཁྱེད་ཀྱིས་མར་མེ་སྐོང་བུ་གང་གི་མིག་ཆུ་བཞུར་སྟངས་ལ
སེམས་ཁ་འཚིག་དོན དོན་སྙིང་ཅི་ཞིག་གིས་སྟོང་ནས་ཡོད
མགོ་བོ་ཡར་ལ་དགྱེས་ཤིག
ཡབ་ཆེན་གྱིས་བསྩལ་བའི་ཁྲག་གི་མེ་ཏོག་དེ་བྲང་ཁར་ཐོགས་ལ
ནམ་ཡང་འཆི་མི་སྲིད་པའི་སེམས་པ་དེའི་སྟོབས་ཤུགས་ཀྱི་ཕྱིར་ན
ཁྱོད་ཀྱིས་གཞོན་ཤ་ཅན་གྱི་ལུས་པོ་འདི
གཉེར་མས་བྲན་ཏུ་འགྱུར་རེག་ཅིག་ལ་བེད་སྤྱོད་གཏོང་རོགས
༢༠༠༨ཀྱི་རྐང་རྗེས་དེ
ལོ་ཐོའི་ངོས་ནས་ཚལ་བར་གཤག་རེག་ཏུ
ཁྱེད་ནས་རང་སེམས་ལ་ལྕགས་སྲེག་གི་ཐམ་ཀ་ཞིག་རྒྱགས་རོགས
དམིགས་ས་དེ་འོད་སྟོང་འབར་བའི་སང་ཉིན་གྱི་ཉི་མ་དེ་ཡིན་ནའང
ས་རུབ་རེག་ཅིག་ལ
ཁྱོད་ཀྱིས་རང་གི་རང་གཤིས་ལས་སྙེམས་པའི་རང་དབང་གི་འཕྲིན་ཡིག་དེ
འཆི་བདག་ལ་བསྐུར་རོགས
འགྲོ་ཤེས་ན དམྱལ་བ་དེ་ལྷ་ཡུལ་ཡིན་ཞིང
ལེན་ཤེས་ན འོད་ཟེར་དེ་ང་ཚོས་ཡིན


འབྲི་ཤོག་དང་དེའི་འགྲམ་གྱི་སེམས་གཏམ།


གྲོགས་པོ། ཞིབ་ཏུ་བསམ་ཚེ། ང་ཚོ་ནི་ནམ་ཡང་བསམ་གཞིག་གི་ཀློང་ན་འཁྱམས་པའི་མི་ཡུལ་གྱི་སྤྲང་བོ་དག་རེད། ནམ་མཁའ་ལྟ་བུའི་
སྟོང་བསམ་གྱི་མཐོངས་ནས། ང་ཚོ་གཤོག་ཐོགས་བཞིན་རང་སེམས་ཀྱི་མཁའ་དབྱིངས་སུ་བསྐྱོད་ཅིང༌། ནམ་མཁའ་ནི་འཇིག་རྟེན་བདག་པོས་ང་ཚོ་ལ་གནང་བའི་འཆར་ཡན་གྱི་འཇིག་རྟེན་ཞིག་ཡིན་པ་འདྲ་བྱུང༌། རྒྱུ་མཚན་ནི་དེ་རུ་ང་ཚོར་ཡིད་ཚིམས་པའི་བསམ་གཞིག་གི་གནས་མལ་གཞན་ཞིག་ཡོད་སྲིད་ཅིང༌། ང་ཚོས་ཐོགས་རེག་བྲལ་བའི་བསམ་གཞིག་གི་སྟོང་དབྱིངས་ནས་རང་ལ་འཚམ་པའི་ཁོར་ཡུག་ཅིག་ཀྱང་བསྐྲུན་ན་ཅིའི་མི་ཆོག དེ་བས་བསམ་གཞིགས་ནི་འཛིན་ཐབས་བྲལ་བའི་མཛེས་སྡུག་གི་འཇའ་ཚོན་དེ་རེད།ཁོར་ཡུག་གི་འདུ་འཛི་དང་རང་སེམས་ཀྱི་རྙོག་འཛིང་ཡོད་ཚད། རེ་རེ་བཞིན་བསམ་གཞིག་གི་ལམ་བུ་འདི་བརྒྱུད་དེ་རང་སེམས་ཀྱི་དཀྱིལ་འཁོར་དུ་བརྟན་སེ་ལྷུང་བས། བསམ་གཞིག་གི་སྨིག་སྤྲིན་བརྡོལ་ཐུབ་པའི་རྟོགས་སད་ཀྱི་ཤེས་པ་དེ་ཅི་འདྲའི་རྙེད་དཀའ་ཨང༌།གྲོགས་པོ་ལགས། ཁྱོད་ཀྱིས་བཤད་ན་ང་ཚོའི་བསམ་གཞིག་གི་གཏིང་རྡོ་རུ་ཅི་ཞིག་ཡོད་དགོས།
གྲོགས་པོ་ལགས། ང་ཚོས་ཁེར་རྐྱང་གི་མགོ་བོ་ཡར་འདེགས་དུས། མཚམས་རེར་རྒྱང་རིང་གི་རི་རབ་དེ་མཐོང་ལ། དེ་མ་ཐག་ང་ཚོར་སེམས་འདུན་གཞན་ཞིག་སྐྱེས་དགོས་བའི་རྒྱུ་མཚན་ཅི།གྲོགས་པོ་ལགས། བསམ་གཞིག་གི་སྣེ་མོར་འགྲེང་བའི་འུ་གཉིས་ཀྱི་ལས་དབང་དེ་སྨིག་སྤྲིན་དང་འདྲ་ནའང་ཁྱེད་རང་འདི་ལྟར་སྔར་མུས་སུ་
འགྲོ་མཚམས་མི་འཇོག་པ་ཅི་ཞིག བསམ་གཞིག་གི་སྣེ་མོ་ནས་འུ་གཉིས་ཀྱིས་ཅི་ཡང་མ་རྙེད་ཀྱང༌། ད་དུང་བསམ་གཞིག་གི་སྣེ་མོ་ནས་ང་ཚོ་འདི་འདྲའི་ཉམ་ཆུང་ཞིང་འུ་ཐུག་ངང་རྒྱུ་དགོས་པའི་རྒྱུ་མཚན་གང༌།
གྲོགས་པོ་ལགས། སྡུག་བསྔལ་ཀྱིས་ཁྱབ་པའི་བསམ་གཞིག་དང་སྤྲོ་སྐྱིད་ཀྱིས་སྐྱོབ་པའི་བསམ་གཞིག་ནི། ང་ཚོའི་ནམ་ཡང་འཛིན་ཐབས་བྲལ་བའི་མི་ཡུལ་གྱི་འཇའ་ཚོན་དེ་ཡིན་ནམ།
གྲོགས་པོ་ལགས། རང་དབང་གི་ཁོར་ཡུག་ཅིག་ནས། དུས་ཚོད་དང་བར་སྣང་དབང་དུ་སྡུད་མཁན་ང་ཚོ་ཡིན་དགོས་ན། ང་ཚོའི་བསམ་
གཞིག་གི་ཀློང་བརྟོལ་མཁན་གྱི་དཔའ་བོ་དེའང་ཕྱི་ཕྱིར་ང་རང་ཚོ་ཡིན་དགོས་སམ། རེ་སྐྱིད་རེ་སྡུག་གི་བསམ་གཞིག མ་འོངས་པའི་ཉི་ཤར་གྱི་རྩེ་མོ་
རང་ཡིན་ན་ཅི་མ་རུང༌། ཡིན་ཡང༌། འདུ་ཤེས་གཞན་ཞིག་གི་དབང་གིས། ང་ཚོ་ནི་བསམ་གཞོག་སྣ་ཚོགས་ཀྱི་བྲན་གཡོག་མ་གཏོགས་བྱེད་མི་ནུས་པ་ཅི།
གྲོགས་པོ་ལགས། ཁྱོད་ཀྱིས་བལྟས་ན། ད་ལྟའི་འཚོ་བའི་ཁྲོད། ཆེས་མཁོ་བ་ནི་བསམ་གཞིག་ཨེ་རེད། སྡུག་སྣང་གིས་བཅོམ་པའི་བསམ་གཞིག་ཉམ་ཐག་དག་གིས་ཆུས་སྦངས་པའི་བསམ་གཞིག་གི་ལྷག་མ་རེད། ཞེ་འཚེར་བའི་རྨ་ཁའི་ཁེབས་པའི་བསམ་གཞིག་གི་ན་ཟུག ད་དུང་ཁྲག་གིས་སྦགས་
པའི་བསམ་གཞིག་གི་རོ་མ་འདི་དག་ནི། ང་ཚོས་ཨུ་ཚུགས་ཀྱིས་སྤྱོད་དགོས་པའི་དུས་རབས་ཀྱི་ཁ་ཟས་ཡིན་ནམ། ཞིབ་ཏུ་བསམ་ཚེ། དེ་དག་ནི་ང་ཚོའི་མི་ཚེ་ཧྲིལ་བོའི་གོད་ཆག་ཁོ་ན་རེད།
གྲོགས་པོ་ལགས། བསམ་གཞིག་སྟོང་གི་སྣེ་མོར་འགྲེང་བའི་ང་ཚོ། ཉི་ནུབ་དང་ནམ་ལངས་ཀྱི་གོ་རིམ་གྲངས་མེད་བཞུགས་པ་བདེན་མོད།
སྒྲ་དབྱངས་ལྟ་བུའི་བསམ་གཞིག་དང་རྨི་ལམ་ལྟ་བུའི་བསམ་གཞིག་མཐའ་དག་ཅི་འདྲའི་ཨ་ཐང་ཆད་པའི་ད་ལྟའི་ང་ཚོའི་བྱ་ཡུལ་ཐ་ཤལ་ཞིག་རེད་ཨང༌།
གྲོགས་པོ་ལགས། དབྱར་དགུན་སྟོན་དཔྱིད་དེ་བསམ་གཞིག་གི་ཁ་དོག་འཛིན་པའི་ལོ་གཅིག་གི་གོ་རིམ་རེད། འཇིག་རྟེན། སྔ་ནས་བསམ་ཡིད་ལས་འདས་པའི་བསམ་གཞིག་གི་ཞིང་ས་ཞིག་ཡིན་ལ། གལ་ཏེ། ཁྱོད་ལའང་ང་ལྟ་བུའི་སྡུག་བསྔལ་ཞིག་ཡོད་ན། དེ་འདྲ་བའི་བསམ་གཞིག་ལས་བརྒལ་ཐབས་བྲལ་ཨང༌། ང་ཚོའི་ཕ་མེས་ཡང་མེས་ཀྱིས་སྐྲུན་པའི་ལས་དབང་ཟླུམ་པོ། ད་ལྟའི་དུས་འདིར། ཁོར་ཡུག་གི་སྨྲ་འརྗོད་དང་རང་སེམས་ཀྱི་བསམ་
གཞིག་དང་རྒྱང་ཐག་ཇེ་རིང་ནས་ཇེ་རིང་ཡིན་པས། བསམ་གཞིག་གི་ཀློང་འདི་ནས། ཆེས་མཁོ་བ་ནི་བསམ་གཞིག་གིས་བསམ་གཞིག་འཚོལ་བ་དང༌། བསམ་གཞིག་ཅིག་གིས་བསམ་གཞིག་གཞན་ཞིག་བཅོམ་དགོས་པ་དེ་རེད། འདི་ནི་གྲོགས་པོ་ཁྱོད་ལ་ནན་བཤད་བྱེད་འོས་པའི་འུ་གཉིས་ཀྱི་ལས་དབང་ཟླུམ་པོ་རེད།
གྲོགས་པོ་ལགས། བསམ་གཞིག་ལ་རྒྱལ་ཕམ་ཡོད་པས། ཁྱོད་ཀྱིས་བལྟས་ན།ལས་རྒྱུ་འབྲས་དང་སྐྱེ་བ་སྔ་ཕྱིའང་བསམ་གཞིག་གི་ཐོབ་
འབྲས་རེད་ཟེར་ན་ཁྱོད་རང་ཨེ་འཐད། ད་དུང་སྲོག་གཅོད་མི་ཆོག་པ་དང་གཡོ་བྱེད་མི་ཆོག་པའང་བསམ་གཞིག་གི་ནང་དོན་རིགས་ཤིག་ལ་གཏོགས་ན། ཁྱོད་རང་སྐྱེ་བ་འདི་དང་སྐྱེ་བ་གཞུག་མ་ཞིག་ལ་བསམ་མེད་པའི་འཇིག་རྟེན་གཞན་ཞིག་གི་བདག་པོ་ཡིན་པའི་ངེས་པ་ཡོད་དམ།
གྲོགས་པོ་ལགས། ངེད་ཅག་གི་བསམ་གཞིག་ནི་མཁའ་མཐའི་སྤྲིན་པ་དེར་བཅོལ་ཞིང༌། རྒྱུགས་སུ་འབབ་པའི་ཆུ་མོ་དེར་བསྐུར་ཡོད། ཁྱེད་
ཀྱིས་འཛིན་ཐབས་ཡོད་ན། ངེད་ཅག་གི་བསམ་གཞིག་གིས་ཁྱེད་ལ་ལུགས་མེད་ཀྱི་དགོད་སྒྲ་ཞིག་དང་ཞེ་མེད་ཀྱི་སྔངས་སེམས་ཤིག་སྟེར་ཡང་སྲིད། འོན་ཀྱང་ཁྱོད་ཀྱིས་ཞིབ་ཏུ་སོམས་དང༌། ཁྱོད་ཀྱི་བསམ་གཞིག་ལ་ཁྱད་པར་ག་འདྲ་མཆིས་སམ། ཡང་ན་ཁྱོད་ཀྱི་ལས་དབང་དང་བདག་གི་ལས་དབང་ལ་ཁྱད་པར་ག་འདྲ་མཆིས་སམ།
གྲོགས་པོ་ལགས། སྒོར་སྒོར་འདྲ་བའི་མི་ཚེ། འཇོང་འཇོང་གི་མི་ཚེ། ནར་ནར་གྱི་མི་ཚེ། དལ་དལ་གྱི་མི་ཚེ། མགྱོགས་མགྱོགས་ཀྱི་མི་ཚེ།
ངེད་ཅག་ལས་དབང་ཟླུམ་པོའི་གདན་སྟེང་དུ་ཅི་ལྟར་བསྡད་ན་འོས། ངེད་ཅག་ལས་དབང་ཟླུམ་པོའི་བཤུལ་ལམ་ནས་ཅི་ལྟར་སོང་ན་འགྲིག

དྲན་པའི་གཞིས་ཆུང་།



རང་སེམས་སོང་བའི་མི་དེ།།
གཏན་གྱི་འདུན་མར་མ་བྱུང༌།།
རྒྱ་མཚོའི་གཏིང་ནས་ནོར་བུ།།
ལོན་དང་མ་ལོན་མི་འདུག།



མི་ཆེན་དཔོན་པོའི་སྲས་མོ།།
སྐུ་ལུས་རྒྱགས་ལུགས་བལྟས་ན།།
ཁམ་སྡོང་མཐོན་པོའི་རྩེ་ཡི།།
འབྲས་བུ་བཟོས་པ་འདྲ་བྱུང༌།།

གྲུ་ཤན་སེམས་པ་ཡོད་པས།།
རྟ་མགོས་ཕྱི་མིག་བལྟས་བྱུང༌།།
བྱམས་པར་ཁྲེལ་གཞུང་མེད་པས།།
ང་ལ་ཕྱི་མིག་མ་བལྟས།།

བྲིས་པའི་ཡི་གེ་ནག་ཆུང༌།།
ཆུ་དང་ཐིགས་པས་མ་འཇིག།།
མ་བྲིས་སེམས་ཀྱི་རི་མོ།།
དུས་དང་རྒས་པས་བསུབ་སོང༌།།

སྟོབས་ལྡན་ཧ་ལོའི་མེ་ཏོག།
མཆོད་པའི་ས་ལ་བཞག་ན།།
གཡུ་སྦྲང་གཞོན་ནུ་ང་རང༌།།
ལྷ་ཁང་ནང་ལ་མི་བཏུད།།

སེམས་སོང་བྱམས་པ་མ་བཞུགས།།
རྒྱལ་ཁམས་གཅོད་ལ་ཕེབས་ན།།
ཕོ་གཞོན་ང་ཡང་མི་འདུག།
ས་མཐའ་འགྲིམ་ལ་ཐལ་འགྲོ །།

བུ་མོ་ཆུང་འདྲིས་བྱམས་པ།།
སྤྱང་ཀིའི་རིགས་རྒྱུད་མིན་ནམ།།
ཤ་འདྲེས་པགས་འདྲེས་བྱུང་ཀྱང།།
ང་རང་ཟ་གྲབས་མཛད་ཀིས།།

རྟ་རྒོད་རི་ལ་ཤོར་བ།།
རྙི་དང་ཞགས་པས་མ་ཟིན།།
བྱམས་པ་ངོ་ལོག་རྒྱབ་པ།།
ངན་མཚང་སློག་པས་ཐུབ་སོང༌།།

མདའ་མོ་འབེན་ལ་མ་ཕོག།
མདེའུ་ས་ལ་འཛུལ་སོང༌།།
ཆུང་འདྲེས་བྱམས་པར་མ་འཕྲད།།
སེམས་ཉིད་རྗེས་ལ་འབྲངས་སོང༌།།

དང་བོ་མ་མཐོང་ཆོག་ག།
སེམས་པ་མ་ཤོར་ཆོག་ག།
གཉིས་པ་མ་འདྲེས་ཆོག་ག།
སེམས་གཅོང་མ་ཡོང་ཆོག་ག།

ཤིང་དེ་བརྒྱ་ཡི་ནང་ནས།།
རྒྱ་ལྕང་སྡོང་བོ་གདམས་ཡོད།།
རྒྱ་ལྕང་ཁོག་པ་རུལ་བ།།
ཨོ་ལོས་ཤེས་ཀྱང་གསང་ཡོད།

World Clocks

修炼

修炼

欢迎光临

欢迎光临

没死之前

没死之前

游子

游子